SQARIM lidhur me procedurat e zhvilluara për blerje të objektit të OAK-së!

16 January 2019

Oda e Avokatëve të Kosovës duke parë keqinformimin dhe shtrembrimin e fakteve nga Kryetari i Degës Regjinale të Prishtinës, në lidhje procedurën për blerjen e objektit të OAK-së, merr shkas që të jap këtë sqarim për anëtarësinë e Regjionit të Prishtinës!

OAK është e interesuar që anëtarësia e saj nga Regjioni i Prishtinës të njoftohet në mënyrë të drejtë dhe me qëllim të informimit të saktë sqaron për anëtarësinë e saj të Regjionit të Prishtinës, në mënyrë kronologjike të gjithë procedurën e zhvilluar, që nga fillimi i plasimit të idesë për blerje, e deri në përcaktimin për objektin për nevojat e OAK-së.

Fillimisht, idesë për blerje të objektit i ka paraprirë Vendimi i Këshillit Drejtues, duke u nisur nga nevoja që edhe OAK të këtë objektin e saj dhe mos të humb mijëra Euro duke paguar qira vjetore, si dhe të gjitha trajnimet të cilat i organizon QTA-ja të mbahen në objektin e OAK-së dhe rrjedhimisht të kursehen të gjitha ato para që OAK i shpenzon për këto trajnime dhe me këtë Vendim Këshilli Drejtues ka vendosur që OAK, të fillojë procedurën për të hyrë në marrëdhënie kontraktuale për blerje të objektit duke specifikuar edhe lokacionet si Qendra, Lagja Pejton, Lagja Dardania dhe të tjera të përaferta.

Këshilli Drejtues i OAK-së me datën 01.11.2017 i drejtohet Kuvendit të Odës së Avokatëve të Kosovës me kërkesë për lejimin, identifikimin dhe hyrje në marrëdhënie kontraktuale për blerje të objektit të OAK-së duke i propozuar cmimin prej 500.000 - 600.000 Euro dhe specifikuar m2 nga 500m2 deri në 600m2 të nevojshme për OAK-në dhe lokacionin se ku do të këtë selinë Qendrore OAK-ja.

Kuvendi i Odës së Avokatëve të Republikës së Kosovës, në mbledhjen e rregullt të tij me datë 04.11.2017 në mënyrë unanime ka vendosur duke e miratuar kërkesën e Këshillit Drejtues të OAK-së dhe autorizon Këshillin Drejtues që të hyjë në një marrëdhënie kontraktuale për blerje të objektit të OAK-së, por, pa u Kufizuar në m2 dhe autorizon Këshillin Drejtues që të hyjë në një marrëdhënie kontraktuale deri në vlerën prej 1.000.000.00 Euro ( Një milion Euro)

Pra, Këshilli Drejtues i OAK-së kishte paraqitur propozimin për m2, për cmimin sa mund të kushtojë dhe për lokacionin ku sipas mendimit të Këshillit Drejtues të OAK-së duhet të jetë: si Qendra, Lagja Pejton, Dardania dhe Lagjet e përaferta e që i bie që selia e OAK-së të jetë në qender të qytetit dhe ky propozim për selinë që të jetë në këto lagje ishte miratuar nga organi më i lartë i Odës së Avokatëve të Kosovës që është Kuvendi i Odës.

Këshilli Drejtues i OAK-së nxjerrë Vendimin e tij, me të cilën bënë shpalljen publike për blerjen e objektit të OAK-së duke u bazuar në Vendimin e Kuvendit të Odës së Avokatëve të Kosovës.

OAK-ja pas shpalljes publike për shprehje të interesit ka pranuar shtatë (7) oferta me pliko të mbyllura dhe atë:

1. Oferta nga Kompania VG Construction (Fshati Hajvali objekti te pallati i drejtësisë)
2. Oferta nga Kompania Art-Ing (objekti në Lakrishte afër Bill Clinton)
3. Oferta nga Z. Bashkim Murati (objekti në lagjen Arbëri Prishtinë)
4. Oferta nga Premium Group (objekti në Lakrishte afër Bill Clinton)
5. Oferta nga Armend Kelmendi (objekti afër shkollës Elena Gjika Prishtinë)
6. Oferta nga Nartel Design (objekti në lagjen Pejton)
7. Oferta nga Olti Trasing ( objekti te Bill Clinton objekti A)

OAK sqaron për anëtarësinë e saj, se nuk kanë qenë vetëm dy (2) oferta, por në Odën e Avokatëve të Kosovës kanë arritur shtatë (7) oferta të cilat janë shqyrtuar nga Komisoni i formuar nga KD-ja si në vijim.

Këshilli Drejtues i OAK-së me qëllim që e gjithë puna rreth blerjes së objektit të jetë transparente dhe të gjindet zgjidhja me e mirë e lokacionit, vendos që të formoj një komision për vlerësimin e ofertave ashtu që secili Kryetar i Degës Regjionale ka caktuar një Avokat nga shtatë (7) regjionet e Kosovës.

Anëtarë të Komisionit sipas propozimeve nga shtatë (7) Kryetarët e Degëve Regjionale janë caktuar: 1. Av. Arben Geci nga Prishtina kryesues, Av. Selami Rexhepi nga Gjilani anëtar, Av. Agim Lushta nga Mitrovica anëtar, Av. Meshar Selimaj nga Gjakova anëtar, Av. Vegim Maloku nga Peja anëtar, Av. Admir Salihu nga Ferizaj dhe Av. Fitim Shporta nga Prizreni anëtar si dhe procesmbajtësi Florim Shefqeti.

Komisioni i përbërë nga avokatët e lartëcekur ka shqyrtuar të gjithë dokumentacionin e ofertuesve dhe në mënyrë unanime Këshillit Drejtues të OAK-së i kanë propozuar që të vendos brenda dy ofertave dhe atë:

1. Ofertën nga Kompania VG Construction (Fshati Hajvali - objekti te pallati i drejtësisë)

• -Sipërfaqëja prej 866.41 m2 neto mund të rritet dhe të zvogëlohet me çmim 1180 me tvsh
• -Çmimi për m2 me tvsh pas rinegociomit është 1180 Euro.
• -Faza e perfundimit të ndërtimit në maj 2018
• -Dizajni i brendshëm sipas kërkesave të OAK-së (të specifikuar me kontratë)
• -Kati i gjashtë (6)
• -Katër (4) ashensor ku një (1) është vetëm për OAK-në.
• -Tre (3) parkingje janë të brendshme janë ofruar për OAK-në ndërsa posedon 10 Parkingje të jashtme për OAK
• -Ndarja fizike përfshihet në çmim.
• -Mënyra e pagesës 50% në lidhjen e kontratës, ndërsa 50% në dorëzimin e çelsave.
• -Planometria: gjerësia 20 gjatësia 60-70
• -Ashensorët gjithsejtë katër, tre të përbashkët dhe një vetëm për OAK-në.
• -Pozicioni i parkingut është prapa.
• -Ngrohja përmes sistemi me energji elektrike.
• -Objekti ka tetë (8) kate ku kati 7 dhe 8 janë zyre

1. Ofertën nga Kompania Art-Ing (objekti në lakrishte afër bill klinton-Prishtinë )

• -Sipërfaqëja prej 703 m2 neto e cila mund të zvogëlohet.
• -Çmimi për m2 neto është 1600 euro me tvsh.
• -Faza e perfundimit të ndërtimit në maj 2018
• -Dizajni i brendshëm sipas kërkesave të OAK-së (të specifikuar me kontratë)
• -Kati i katërt (4)
• -Katër (4) ashensor janë vetëm deri në katin e pestë (5)
• -Një ashensor është vetëm për OAK-në.
• -Katër parkingje pa pagesë.
• -Posedon hyrje të veçantë vetëm për OAK-në
• -Posedon ngrohje Qendrore me Termokos.
• –Në çmim ofrohen 4 garazha për OAK-në dhe ka mundësi shfrytëzimi të parkingjeve të përbashkta që janë 190 që janë të shfrytëzueshme.
• –Ndarja fizike sipas kërkesave të OAK-së përfshihet në këtë çmim.
• -Mënyra e pagesës 40% me lidhje të kontratës, 40% pas 90 ditësh dhe 20% në dorëzimin e çelsave.
• -Planometria: gjerësia 35 me 35 gjatësia
• -Pozicioni i parkingut 4 parkingje të mbyllura për OAK, ndërsa nga 190 të përbashkët 166 janë të brendshëm dhe 24 të jashtëm.
• –Nga kati 14 deri 20 është hotel ndërsa kati 21 Restorant.
• –Ka dy parë shkallë dhe një parë shkallë emergjente.
• –Nuk ka pjesë banimi në tërë objektin.

Këshilli Drejtues i OAK-së me datën 05.01.2019 ka vizituar dy objektet e propozuara ashtu që përveç dokumentacionit me detaje është informuar edhe për së afërmi me detajet e të dy objekteve në mënyrë që të këtë një pasqyrë të saktë me rastin e përcaktimit për objekt të OAK-së.

Këshilli Drejtues i OAK-së në mbledhjen e rregullt të tij të mbajtur me datën 14.01.2019 ka shqyrtuar propozimet e Komisionit për këto dy oferta të cilat sipas Komisionit janë më të favorshme, ashtu që Këshilli Drejtues pas diskutimeve të zhvilluara, fillimisht e hodhi në votim ofertën Ofertën nga Kompania VG Construction (Fshati Hajvali - objekti te Pallati i Drejtësisë) e cila ofertë mori vetëm një (1) vote, pastaj hodhi në votim Ofertën nga Kompania Art-Ing (objekti në Lakrishte afër Bill Klinton-Prishtinë ) e cila ofertë mori tetë (8) vota kështu që Këshilli Drejtues i OAK-së vendosi që të përcaktohet për ofertën nga :

1. Kompania Art-Ing (objekti në Lakrishte afër Bill Clinton - Prishtinë)

OAK sqaron, se deri në marrjen e vendimit për përcaktim për objektin e OAK-së, diskutimet në Këshillin Drejtues ishin konstruktive dhe vetëm pasi Këshilli është përcaktuar për objektin e OAK-së kanë filluar mospajtimet nga Kryetari i Degës Regjionale të Prishtinës dhe një frustrim nga ana e tij arsyet e kësaj mund t’i dij vetëm ai personalisht.

Këshilli Drejtues, me rastin e vendosjes për t’u përcaktuar për ofertën më të mirë sipas diskutimeve që janë zhvilluar, përveç detajeve nga oferta (hapsira, kushtet, cmimi,) ka pasur parasysh edhe Vendimin e këtij Këshilli Drejtues se lokacioni i propozuar dhe i miratuar nga Kuvendi i Odës së Avokatëve të Kosovës të jetë në qytetin e Prishtinës dhe jo jashtë qytetit të Prishtinës.

OAK shpreh keqardhje për informimin jo të drejtë të anëtarësisë së saj nga Regjioni i Prishtinës, të bërë nga Kryetari i Degës Regjionale të Prishtinës dhe me këtë rast, OAK ofron argumentet e saja se pretendimet e Kryetarit të Degës Regjionale janë personale dhe ska të bëjë fare me gjendjen reale sepse objekti për të cilën ka pretenduar Kryetari i Degës Regjionale ka qenë jashtë lokacionit të përcaktuar nga Këshilli Drejtues dhe i miratuar nga Kuvendi i Odës së Avokatëve të Kosovës si organi më i lartë.

OAK fton të gjithë anëtarësinë e saj, të cilët janë të interesuar që të informohen me të gjithë procedurën të cilën e ka ndjekur Këshilli Drejtues i OAK-së, që nga fillimi e deri më tani dhe se Oda e Avokatëve të Kosovës do të jetë e hapur, sepse secili anëtarë ka të drejtë të marrë informacion në shtepinë e tij që është OAK.

ODA E AVOKATËVE TË KOSOVËS

Më 16.01.2019